កំណែទម្រង់ការប្រឡងបាក់ឌុបធ្វើឲ្យសិស្សមិនឲ្យតម្លៃមុខវិជ្ជាសង្គម

អត្ថបទ៖ រឿន វាសនា, ឡោ រក្សា និង ផល ឧត្តម

 

ទោះបីជាខែកញ្ញា ជាពេលវេលាវិស្សមកាលមួយសម្រាប់សិស្សានុសិស្សលំហែកាយកម្សាន្តឬសម្រាកនៅផ្ទះក្ដី ទិដ្ឋភាពនៃវិទ្យាល័យ​សុខអានសំរោងដែលស្ថិតនៅក្នុងភូមិខ្វាវ ឃុំខ្វាវ ស្រុកសំរោងខេត្តតាកែវហាក់ពុំស្ងប់ស្ងាត់ឡើយ។ មិនខុសពីវិទ្យាល័យដទៃៗ​ទៀតក្នុងប្រទេសកម្ពុជាឡើយ ថ្នាក់រៀនមួយចំនួននៃវិទ្យាល័យនេះកំពុងបើកទ្វារសម្រាប់លោកគ្រូ​អ្នកគ្រូដំណើរការ​បង្រៀនគួរ​ដល់សិស្សានុសិស្ស ដែលភាគច្រើនជាសិស្សថ្នាក់ទី១១ ត្រៀមចូលថ្នាក់ទី១២។

ម៉េង យ៉ារី ជាសិស្សម្នាក់ក្នុងចំណោមពួកគេ បានប្រាប់ថាមុខវិជ្ជាដែលនាង និងសិស្សដទៃទៀតកំពុងរៀនមានដូចជា៖ គណិតវិទ្យា រូបវិទ្យា គីមីវិទ្យា និង ជីវវិទ្យា។ ថ្នាក់រៀនត្រូវបានញាត់ពេញដោយសិស្ស​ ដែលធ្វើឲ្យ យ៉ារី រកកន្លែងអង្គុយស្ទើពុំបាន​ព្រោះនាងមក​យឺតជាងគេបន្តិច។ 

ទិដ្ឋភាពដែលបានរៀបរាប់នេះបានធ្វើឲ្យលោកគ្រូអ្នកគ្រូភាគច្រើនសប្បាយចិត្ត ព្រោះវាហាក់បង្ហាញថាសិស្សកំពុងយក​ចិត្តទុកដាក់​និងឲ្យតម្លៃលើការ​សិក្សាជាងមុន។ ចំពោះលោក ឃិន សុផាន់ គ្រូបង្រៀនម្នាក់នៃវិទ្យាល័យសុខអានសំរោងក៏យល់ឃើញដូចនេះដែរ តែលោកហាក់សម្ដែងការខកចិត្តបន្តិចបន្ដួចដែរ ព្រោះមុខវិជ្ជាសីលធម៌ពេលដែលលោកបង្រៀន សិស្សមិនសូវឲ្យតម្លៃដូច​មុខវិជ្ជាគណិតវិទ្យា គីមីវិទ្យា ឬ រូបវិទ្យាឡើយ។

មិនមែនមានតែ​លោក ឃិន សុផាន់ម្នាក់ទេ ដែលយល់ឃើញបែបនេះ នៅមានគ្រូបង្រៀនមុខវិជ្ជា ភូមិវិទ្យា ផែនដីវិទ្យា និងសីលធម៌ជាច្រើនអ្នកទៀតដែលមាន​ទស្សនៈស្រដៀងនេះថា សិស្សបច្ចុប្បន្នហាក់មិនសូវឲ្យតម្លៃមុខវិជ្ជាវិទ្យាសាស្រ្តសង្គមទេ។ ហើយសូម្បីតែសិស្សដែលបានទើបប្រឡងបាក់ឌុបថ្មីៗ ក៏យល់ឃើញបែបនេះដែរ។

តោញ ធារី ជាអតីតសិស្សប្រឡងបាក់ឌុបឆ្នាំ ២០១៧ បានលើកឡើង “ពេលរៀននៅផ្ទះ ខ្ញុំតែងមើលមេរៀន គណិត រូប គីមី និងជីវៈ តែមិនសូវមើល ភូមិ សីលធម៌ ផែនដីអីទេ ព្រោះមុខវិជ្ជាទាំងហ្នឹងគេអត់ប្រឡងផង”។

បញ្ហា និង ក្ដីបារម្ភទាំងនេះមិនមែនជារឿងដែលកើតឡើងដោយចៃដន្យនោះទេ តែវាទាក់ទងទៅនឹងកំណែទម្រង់នៃការប្រឡង​សញ្ញាបត្រមធ្យមសិក្សាទុតិយភូមិក្នុងរយៈពេលបួនឆ្នាំចុងក្រោយនេះ។ 

២០១៤ ជាឆ្នាំដែលរដ្ឋមន្ត្រីក្រសួង​អប់រំ​យុវជន​​និងកីឡាចូលកាន់តំណែងថ្មី លោក ហង់ ជួនណារ៉ុន បានប្រកាសធ្វើកំណែទម្រង់​ស៊ីជម្រៅលើវិស័យអប់រំ ជាពិសេសទៅលើដំណើរការនៃការប្រឡងសញ្ញាបត្រ​មធ្យមសិក្សាទុតិយភូមិឬបាក់ឌុប។ ដំណើរការនៃ​ការប្រឡងត្រូវបាន កែប្រែស្ទើរទាំងស្រុងដោយរាប់បញ្ជូលទាំងការពង្រឹងវិន័យ ការកាត់បន្ថយរយៈពេលប្រឡង និង ការរៀបចំ​មណ្ឌលប្រឡង ក្នុងគោលបំណងពង្រឹងគុណភាព និង សមត្ថភាពបេក្ខជនប្រឡងឲ្យប្រសើរឡើងវិញ ដូចអ្វីដែលលោក ហង់ ជួនណារ៉ុនលើកឡើងថា “អ្នកចេះគឺជាប់”។

ទន្ទឹមនឹងកំណែទម្រង់ពេលវេលា និង វិន័យនៃការប្រឡង ក្រសួងអប់រំក៏បានកែប្រែផងដែរនូវការដាក់វិញ្ញាសាសម្រាប់ការប្រឡង ដោយក្រសួងបានកាត់បន្ថយពីការប្រឡង១០មុខវិជ្ជា មកត្រឹម៧មុខវិជ្ជា។ សម្រាប់ថ្នាក់វិទ្យាសាស្ត្រពិតមុខវិជ្ជាដែល​ត្រូវប្រឡង​ជាទូទៅរួមមាន៖ ​គណិតវិទ្យា រូបវិទ្យា គីមីវិទ្យា ជីវវិទ្យា អក្សរសាស្រ្តខ្មែរ និងភាសាបរទេស។ ចំណែកឯមុខវិជ្ជាសីលធម៌-ពលរដ្ឋវិជ្ជា ប្រវត្តិវិទ្យា ភូមិវិទ្យា និង ផែនដីវិទ្យានិងបរិស្ថានវិទ្យា ត្រូវបានគេកំណត់ថាជាមុខវិជ្ជាជម្រើស​ដោយត្រូវជ្រើសមកមួយ​ក្នុងចំណោម​នោះមកធ្វើជាវិញ្ញាសាប្រឡង។ 

តែអ្វីដែលគួរឲ្យកត់សម្គាល់ រយៈពេលបួនឆ្នាំមកនេះមុខវិជ្ជាជម្រើសសម្រាប់ថ្នាក់វិទ្យាសាស្រ្តពិតគឺបានទៅលើមុខវិជ្ជា ប្រវត្តិវិទ្យាជានិច្ច។ ដោយឡែកមុខវិជ្ជា សីលធម៌ ពលរដ្ឋវិជ្ជា ភូមិវិទ្យា និង ផែនដីវិទ្យាមិនត្រូវដាក់បញ្ចូលក្នុង​វិញ្ញាសាសម្រាប់ការ​ប្រឡង​ម្ដងណាឡើយ។ 

តាមរយៈបទសម្ភាសន៍ លោក ឃឹន សុផាន់ បានលើកឡើងថាក្នុងនាមជា​គ្រូបង្រៀន​​មុខវិជ្ជាសីលធម៌ ពលរដ្ឋវិទ្យា លោកចង់​ឲ្យមុខវិជ្ជានេះក្លាយត្រូវបានជ្រើសរើសសម្រាប់វិញ្ញាសាប្រឡងបាក់ឌុប។ “ការពិតទៅសម្រាប់ថ្នាក់វិទ្យាសាស្រ្តសង្គម សីលធម៌ពល​មានក្នុងវិញ្ញាសាប្រឡង តែសម្រាប់វិទ្យាសាស្ត្រពិតគេដាក់ជាមុខវិជ្ជាជម្រើស។ ហើយក្នុងនាមជាគ្រូបង្រៀនមុខវិទ្យានេះ ខ្ញុំចង់ឲ្យមាន​ការ​ប្រឡងមុខវិជ្ជានេះ តែធ្វើម៉េចបើគេចាប់បានតែប្រវត្តិរហូត!” លោកគ្រូ សុផាន់ បញ្ជាក់។

ការជ្រើសយកមុខវិជ្ជាប្រវត្តិវិទ្យា​ ជាមុខវិជ្ជាជម្រើសសម្រាប់ការប្រឡងបាក់ឌុប ៤ឆ្នាំជាប់គ្នាមកនេះ ត្រូវបានសាធារណៈជន​មួយចំនួនរិះគន់ថា មិនមែនជាការចាប់ឆ្នោតដោយ    ចៃដន្យនោះទេ តែជាអ្វីដែលក្រសួងរៀបចំទុកជាមុន។ គណនេយ្យហ្វេសបុក​មួយចំនួនហ៊ានទាំង លើកឡើងថា “គ្រូភូមិ សីលធម៌ ផែនដី មិនបាច់ខំបង្រៀនពេកទេ ព្រោះគេគង់តែ គេចាប់ឆ្នោតបាន​ប្រវត្តិវិទ្យាដដែល”។

ឆ្លើយតបនឹងការលើកឡើងនេះ លោក រស់ សុវិចារ អ្នកនាំពាក្យអគ្គនាយកដ្ឋានមធ្យមសិក្សាទូទៅនៃក្រសួងអប់រំយុវជននិង​កីឡាបានលើកឡើងថា ការកំណត់វិញ្ញាសាប្រឡងនេះគឺផ្អែកតាមកំណែទម្រង់របស់ក្រសួងអប់រំកាលពីឆ្នាំ២០១៤ ហើយចំពោះការ​ចាប់មុខវិជ្ជាជម្រើសនេះគឺដើម្បីឆ្លើយតបនឹងកម្មវីធីអប់រំទំនើបរបស់ក្រសួងអប់រំយុវជននិងកីឡា។ លោកបន្ថែមថា “ចំពោះឆ្នាំក្រោយ ខ្ញុំមិនទាន់ដឹងទេថា ប្រវត្តិវិទ្យានៅតែអាចបន្តជាមុខវិជ្ជាជម្រើសទៀត ឬយ៉ាងណាទេ? ព្រោះជាគោលការណ៍ យើងនឹងប្រកាសវាមួយខែមុនការប្រឡង។”​

គួរប្រឡង ១០មុខឬ ៧មុខ?

“ខ្ញុំគិតថាទោះបើក្រសួងធ្វើកំណែទម្រង់ បែងចែកថ្នាក់វិទ្យាសាស្រ្ត ថ្នាក់សង្គម ក្រសួងគួរតែវិលត្រឡប់ទៅការប្រឡង ១០មុខវិជ្ជា ដូចកាលពីឆ្នាំ២០១៣វិញ ព្រោះថាក្រសួងធ្វើកំណែទម្រង់ បែងចែកតែថ្នាក់ក្រោម(វិទ្យាល័យ) តែថ្នាក់លើ(សាកលវិទ្យាល័យ)អត់ទាន់បានបែងចែកនៅឡើយទេ។ ដូច្នេះវាអាចពិបាកដល់សិស្ស ព្រោះសិស្សខ្លះពូកែវិទ្យាសាស្រ្តទៅរៀនសង្គម ខ្លះពូកែសង្គមទៅរៀនវិទ្យាសាស្រ្តពិត...ហើយ(មុខវិជ្ជា)សីលធម៌ជាឧទារណ៍ វាសំខាន់ណាស់សម្រាប់សិក្សា​មុខជំនាញមួយ​ចំនួននៅថ្នាក់មហាវិទ្យាល័យ!” នេះជាការលើកឡើងរបស់លោក ឃិន សុផាន់ នៅពេលអ្នកសារព័ត៌មានសួរនាំ​អំពីមតិរបស់លោកចំពោះកំណែទម្រង់ការប្រឡងបាក់ឌុបកន្លងមក។

ចំណែកលោក រស់ សុវិចារ បានឆ្លើយតបនឹងការលើកឡើងនេះថា “តាមពិតកំណែទម្រង់របស់ក្រសួងកំពុងស្ថិត​នៅដំណាក់កាល​សាកល្បង​នៅឡើយទេ រៀងរាល់បួនឆ្នាំម្ដង ក្រសួងនឹងប្រមូលមតិយោបល់ និងអនុសាសន៍លោកគ្រូ ពីគ្រប់មជ្ឈដ្ឋាន ធ្វើយ៉ាងឲ្យ​លទ្ធផល​នៃកំណែទម្រង់កាន់តែប្រសើរឡើង”។

តែបើក្រឡេកមើលទៅប្រព័ន្ធអប់រំនៅក្នុងប្រទេសជិតខាងវិញ ក៏មានការធ្វើកំណែទម្រង់របស់ខ្លួនផងដែរ។ ជាក់ស្ដែងប្រទេសថៃ​បានធ្វើកំណែទម្រង់ស៊ីជម្រៅដំបូងរបស់ខ្លួនក្នុងឆ្នាំ១៩៩៥ ហើយចាប់ពីឆ្នាំ២០០៥ សិស្សដែលបញ្ចប់ថ្នាក់វិទ្យាល័យ តម្រូវឲ្យឆ្លងកាត់ការប្រឡងថ្នាក់ជាតិទូទៅដែលកាន់ថា O-NET។ ការប្រឡងនេះមានវិញ្ញាសា ៨មុខវិជ្ជាគឺ៖ អក្សរសាស្រ្តថៃ គណិតវិទ្យា វិទ្យាសាស្តពិត វិទ្យាសាស្តសង្គម ជំនាញកុំព្យូទ័រ ភាសាអង់គ្លេស ពេលនេះម៉ោង​ ១១ព្រឹក​​ហើយ វាក៏ជាពេលដែលយ៉ារីត្រូវចេញពីរៀនត្រឡប់ទៅផ្ទះវិញដែរ។ 

នាងបានប្រាប់ថាមូលហេតុដែលនាងខំរៀនមុខវិជ្ជាទាំងនោះ ជាងមុខវិជ្ជាសង្គម ព្រោះវានឹងជួយនាងឲ្យប្រឡងជាប់និងបាននិទ្ទេសល្អ ខណៈដែលនាងសិស្សម្នាក់ក្នុងថ្នាក់វិទ្យាសាស្ត្រពិត៕